و لـيـه مـا اغـسـِّـل الـعِــدَّة ؟
و كـيـف مـا اغـسِّـل الـعِــدَّة ؟ ..
و جـُـوّاى تـضحـيـات مـن أُم -
شـِقَـت لـمّـا الـزمـن عَــدّى ..
و أخـوات أبـْـدَعَــن فـى الـبـيـت -
تـفـانـِى و إلـفـة مـُمـتـدة ...
كـُـفـُـوف بـى الـمـويـة و الـصـابـون ,
تـغـَـسِّـل مـن زمـن بـدرى ..
دا بـس بـاللهِ كـم مـاعُــون ؟ ,
قـبـُـل مـا أفـهـم الـمـضـمـُون ,
و اسـتـوْعـِـب لـِمَـا يـَجـْرى ..

شـِنـُو الأنـا يـعـنـى سـَـوَّيـتــُو ؟ ..
إذا كـان الـنـّبـِى الـمـخـتـار ,
بـِكـلّ الـرّحـمـة و الايـثـار ,
بـِساعـِـد فـى أهَــل بـَـيـتــُو ..
فـمَـن أنـا شـان أكـون سُـلـطـان؟ ,
أقــُـوم مـن كـرسـى لـى كـَنـَـبـَة ..
و أسـتـنـْكـِف مَـشـِى الـدُّكـان ,
و أعـمـل كـلّ يــوم غـَـلـَـبـَة ..
بـَـكـون كـِدا - باخـتـصار- وهـْمـَان
و فـاهـْـم الـدنـيـا بـى الـقـَـلـَـبـَة ..

و كـيـف مـا اغـسِّـل الـعِــدَّة ؟
و احـِس فـى الـرّغــوة و الـلـيـفَـة -
بـِنـظـرة مـُضـيـئـة مـن ذاتـى :
رَحـَابـة أمـى و اخـواتـى
و قـِيـَـم أعـجَـزنـِى تـصـنـِيـفـَا ..

تـعـال كـلـِّمـنـى يـا الـمـَـصْـفـَا ,
و يـا الـكـَـفـَـتـَيـرة ورِّيـنـى ..
مـلامـِح هـذهِ الـوَصْـفــَة ,
لـعـلـُّـو الـهـِمَّـة تـهْـديـنـى .. !
و اسـاعـِـد قـَـدْر مـا أمـكـَـنْ ..
أغـسِّـل اقـَـلـُّـو كـُـبـّايـتـَـيـن ,
و اتـمِّـر - بـى عـِنـايـة - صَحَـنْ ..

بــَـقـَـول لـى كـلِّ مـن يـَـسْـخَـر :
أنـا الـرّجُـل الـذى يَـفـخَـر -
بـانـّـو بـِغـَـسِّـل الـعـِـدَّة ..
و فـى فـَهـمـِى الـرّجـولـة الـصَّـاح :
ثـِقـة و طـاقـة عـَـطـاء و سـمـاح ..
و يـا مـَـن سـَـوْفَ تـِتـْحـدَّى -
بـَـقـُـول لـيـك بـى ضـمـيـر مـُـرتـاح :
رجـُـولـتـك مـا شـَـنـَـب مـفـتـُـول ,
و لا عـيـن حـَـمـْرا زىّ الـغُــول ,
دى رحـمـة و تـضحـيـات و أصُـول -
تـبـِيـن فـى الـرأفــَة و الـشـِّـدَّة ...

محمد حسن الـسـيـّـد
2013